Saturday, June 20, 2009

Katulad ng dati

Naalala ko noong bata pa ako, tuwing papasok ako sa school lagi akong hinahatid ng nanay ko. Dala ang backpack na may Voltron na design at baunan na sigurado akong pinuno ng kanin ni Mama, hawak ko ang kamay niya at iniiwasan kong bumitaw dahil buong araw ko nanaman siya hindi makakasama.

Buong araw na nagsusulat ng mga kung anu-ano. Drawing ng mga hugis ng bahay at mga taong iisa ang hitsura, humaba lang ang buhok para sabihing babae, hindi ko maiwasang mabagot sa school noon at gustuhin ng umuwi. Lagi lang naman akong nakikipagkulitan sa katabi ko. Nagsusulatan kami sa braso ng isa't-isa. Lugi siya dahil ballpen ang gamit ko samantalang lapis lang ang kanya. Talo lang ako madalas kasi nakikita ng teacher namin kapag nagsusumbong siya.

Ang saya ko pa noon kapag may tatak ng star ang likod ng palad ko. Very Good daw. Hindi ko pa narealize noon na dinudumihan lang talaga ako ng teacher namin. Atleast Very Good naman kaya natutuwa si Mama sa akin.

Ang simple ng buhay noon. Assignments lang ang problema. Quiz lang ang dahilan kung bakit ko kailangan iyakan si Mama para hindi ako magreview dahil tinatamad ako. Or dahil gusto kong maglaro ng Mario Bros. sa Family Computer.

Ngayon, may mga trabaho na. May mga kailangan ng bayaran. May mga kailangan ng kumbinsihin na matanda ka na. Lalo pa kung may kinalaman sa puso.

Sana madaling balikan ang kahapon. Magkulay ng mga libro. Makipagtakbuhan sa mga kaklase. makipagkwentuhan tungkol sa Star Wars at kung sino ang mas may astig na tatay.

At sana ngayon, katulad ng dati, may isang sasalubong sa akin pauwe. Nakangiti at hinihintay ang kwento ko sa kung anong nangyari sa araw ko.

5 comments:

Frods said...

*um!* gold star sa palad. haha

kyle said...

nice one... :) pero may mga bagay talaga na hindi na natin pwede ibalik...

DN said...
This comment has been removed by the author.
DN said...

now, this made me think about what i would give in exchange for my undergrad days to come back...

beNj said...

Its really nice to remember all the good things that happen in the past, specially those happy moment..haaaayy nakakamis

Related Posts with Thumbnails
 
;